والله ما ننسى أيام لكنت رضيع ** وأنت يا يمة بالدر لي سقيتي
ومالقيت غيرك يا والدة لي نفيع ** بالحنان والرحمة علي سخيتي
وقت السقم وساعة لنكون وجيع ** بالدموع والعبرة في ساع ما بكيتي
والناس في النوم تغط ليها متيع ** وأنت بالسهر والتعب وحدك رضيتي
عن جالي تعدي نومك تقطيع ** ولا رمشة جفن من قدايا سهيتي
تشريلي الصحة لو كان فيها بيع ** نلقاها واجدة بغلاها لي شريتي
وساعة لنبرى تعدي شتاك ربيع ** بالتربيج وخيرة الغنى علي غنيتي
يا سعدي كبر بش يعودلي شفيع ** ومن فضل الدنيا والآخرة لي دعيتي
وبعد لترعرت في حضنك ترعريع ** خيارالطعام الشهي لي سجيتي
والشيء الي راني بيه وليع ** بلا بطية يجي وبايدك حطيتي
وكانه شر أنت الأولى ليه دفيع ** المهم يخطاني والخير لي تمنيتي
وقداش غطيتيني عن هول الصقيع ** ولصدرك الطاهر دويلة ضميتي
وقداش نحيتي عني الأذى الشنيع ** بايمينك ولباس الطهر لي هديتي
وعلي خرج سمح مواتي بديع ** وأنت فارحة وخياره عن جالي هويتي
وشيعتيني بالنصح لوقت الكبر تشييع ** لال ساعة الأدب ولقراية قريتي
ومن خيار ربايتك ما فيها نزيع ** ومن بحرها الصافي وزلاله سقيتي
وبعد عمر الضعف وليت شجيع ** ولمعرفة الرجال وقعدهم لي لزيتي
وياما قعدنا أيام العز جميع ** ومن سمح الأشعار علي رديتي
ودعوة الخير راني فيها طميع ** وعلى ربي من كيلها لي وفيتي
وعلمتيني لال عدت لقولك نطيع ** ودعاء الرحمة أنت عليه جريتي
وتو نطلبلك ربي العالي السميع ** يتغمدك برحمته على ما لصغري ربيتي
وفي لخر نصلي عالهادي الشفيع ** وان شاء الله في الآخرة من حوضه رويتي